Ադրբեջանը զգոն է Ռուսաստանի դեմ կիրառվող սահմանափակումների հարցում․ նախագահի օգնական

Ադրբեջանը 2022 թվականից Ուկրաինային տրամադրել է ավելի քան 40 միլիոն դոլարի աջակցություն՝ ներառյալ մարդասիրական բեռներ, վերակառուցման ծրագրերում ներգրավվածություն և ուկրաինացի երեխաների վերականգնողական նախաձեռնություններ։ Այդ մասին Բրյուսելում EU Today-ին տված հարցազրույցում տեղեկացրել է Ադրբեջանի նախագահի օգնականը և նախագահի աշխատակազմի արտաքին քաղաքականության բաժնի ղեկավարը՝ Հիքմեթ Հաջիևը։

Նրա խոսքով՝ երեխաների վերականգնողական ծրագիրը շարունակական է, իսկ Ադրբեջանը դա դիտարկում է որպես մարդասիրական պարտավորությունների մաս։ Հաջիևը միաժամանակ նշել է, որ Բաքուն չի մասնակցել և չի նախատեսում մասնակցել ուկրաինական հակամարտության ռազմական բաղադրիչին։

Խոսելով պատժամիջոցների թեմայից՝ Հաջիևն ասել է, որ Ադրբեջանը զգոն է կիրառվող սահմանափակումների հարցում և հերքում է մեղադրանքները, թե երկիրը օգնում է Ռուսաստանին շրջանցել դրանք։ Նա հավելել է, որ Բաքուն և Մոսկվան 2022-ից ի վեր էականորեն չեն մեծացրել երկկողմ առևտրի ծավալը։

Անդրադառնալով տարածաշրջանային առևտրային հոսքերին՝ Հաջիևը անդրադարձել է Ռուսաստանի հետ Հայաստանի առևտրի աճին՝ նշելով, որ այն ձևավորվում է հիմնականում վերարտահանման հիմքով։ Նրա խոսքով՝ այդ հոսքերը չեն կապված նոր արդյունաբերական արտադրանքի հետ։