Թրամփն ԱՄՆ հարձակումը Իրանի դեմ անվանել է անթերի

ԱՄՆ նախագահ Դոնալդ Թրամփը հայտարարել է, որ հունիսի 22-ին Իրանի միջուկային օբյեկտների դեմ իրականացված գործողությունն անցել է առանց խնդիրների։  «Դա անթերի առաքելություն էր»,– նշել է Թրամփը Գոհաբանության օրվա կապակցությամբ զինծառայողներին ուղղված իր ուղերձում։

Հիշեցնենք, որ Իսրայելը հունիսի 13-ի գիշերը սկսել էր գործողություն Իրանի դեմ՝ մեղադրելով նրան գաղտնի ռազմամիջուկային ծրագիր իրականացնելու մեջ։ Օդային հարվածների և դիվերսիոն գործողությունների նպատակը եղել են Իրանի ատոմային օբյեկտները, ռազմական հրամանատարական ստորաբաժանումները, ճանաչված միջուկային ֆիզիկոսները և ավիաբազաները։

Իրանը հերքել էր մեղադրանքները և պատասխանել սեփական հարձակումներով։ Պատերազմական գործողությունները շարունակվել էին 12 օր, որոնց ընթացքում գործընթացին միացել էր նաև ԱՄՆ-ը՝ հունիսի 22-ի գիշերը մեկանգամյա հարված հասցնելով Իրանի միջուկային օբյեկտներին։ Դրանից հետո Իրանը հունիսի 23-ի երեկոյան հրթիռային հարվածներ էր հասցրել Կատարում տեղակայված ամերիկյան Էլ Ուդեյդ ռազմակայանին՝ ընդգծելով, որ չի նախատեսում շարունակել սրացումը։

Դոնալդ Թրամփը հույս էր հայտնել, որ Իրանի այս քայլը «փուքսը թողնելու» նշան է եղել, ինչի հետևանքով հնարավոր է ստեղծվի խաղաղության և կայունության միջավայր Մերձավոր Արևելքում։ Նա նաև նշել էր, որ Իսրայելն ու Իրանը եկել են հրադադարի պայմանավորվածության։