Դեռ պետք է ճշտել՝ ԱԱԾ-ի կողմից օպերատիվ նկարահանում իրականացնելու թույլտվություն եղե՞լ է, թե՞ ոչ․ Զեյնալյան
Իմ կողմից նշանակվել է ծառայողական քննություն ԱԱԾ-ի կողմից հրապարակված նյութի վերաբերյալ բազմակողմանի և օբյեկտիվ տեղեկատվությունը բացահայտելու և հանրության ներկայացնելու համար: Կառավարության այսօրվա նիստի ավարտից հետ լրագրողների հետ զրույցում ասաց արդարադատության նախարար Արտակ Զեյնալյանը՝ անդրադառնալով քրեակատարողական հիմնարկներից մեկում ԱԱԾ-ի կատարված հետախուզությանը:
«Նախ պետք է ճշտել՝ օպերատիվ նկարահանում իրականացնելու թույլտվություն եղե՞լ է, թե՞ ոչ: Ծառայողական քննությունը կպարզի՝ ինչն է օրինական եղել, ինչը՝ անօրինական: Ես իրավական գնահատական չեմ կարող տալ, այս գործը, բնականաբար, դառնալու է դատական վերահսկողության առարկա, և դատական իշխանությունն է սրա օրինականության վերաբերյալ գնահատական տալու»,- նշեց Արտակ Զեյնալյանը:
Նրա խոսքով՝ ԱԱԾ-ի կողմից խուզարկությունները տեղի են ունեցել Արմավիր քրեակատարողական հիմնարկում և ՔԿՀ պետը պաշտոնից ազատվելու վերաբերյալ դիմում է ներկայացրել:
«Մենք քննարկում ենք իրականացրել, դեպքի վերաբերյալ խորհրդակցություններ ենք անցկացրել և քրեակատարողական հիմնարկի պետը դիմում է ներկայացրել պաշտոնից ազատվելու վերաբերյալ. ես բավարարելու եմ դիմումը: Արմավիր ՔԿՀ-ի պետի դիմումն այսօր պետք է մուտքագրվի արդարադատության նախարարությունում: Նա իր կամքը ձևավորվել է ազատորեն և իր կամքը դրսևորել է ազատորեն: Դա ինքն է որոշել, բայց, անշուշտ, սրանք (խմբ. ԱԱԾ խուզարկությունը) մեկը մյուսի հետ կապված են»,- հայտնեց նախարարը:
Նշենք, որ ՀՀ ԱԱԾ մամուլի կենտրոնի տեղեկացմամբ՝ քրեակատարողական հիմնարկում կատարված անսպասելի խուզարկությունների արդյունքում որոշ կալանավորների խցերում՝ ներկառուցված թաքստոցներում, հայտնաբերվել են Wi-Fi սարքեր, պլանշետներ, հեռախոսաքարտեր, բջջային հեռախոսներ: Անակնկալ խուզարկությունների արդյունքում նաև պարզվել է, որ կալանավայրի խցերում անվտանգության տարրական կանոնները չեն պահպանվել: Մասնավորապես՝ բաց են եղել որոշ խցերի կերակրադռներ («волчок»), առանձին կալանավորներ պահվել են արտոնյալ պայմաններում, իսկ մասնաշենքերից մեկի «նայողի» խուցն առհասարակ բաց է եղել, և նա կանգնած է եղել դրսի կողմից մուտքի մոտ:
