Ռուսաստանը մերժել է Էրդողանին. հացահատիկային համաձայնագիրը վերականգնելի չէ
Ռուսաստանի փոխարտգործնախարար Սերգեյ Ռյաբկովը հայտարարել է, որ հացահատիկային համաձայնագրի ժամանակը «ավելի շուտ անցյալում է մնացել»։ Այս մասին նա ասել է՝ մեկնաբանելով Թուրքիայի նախագահ Ռեջեփ Թայիփ Էրդողանի մտադրությունը՝ քննարկելու հացահատիկի միջանցքի գործարքի երկարաձգման հնարավորությունը։
Ռյաբկովը նշել է, որ թեև պարենային անվտանգության ոլորտում անհրաժեշտ են գործուն և արդյունավետ ջանքեր, սակայն ներկայում պայմանները այլևս չեն նպաստում հացահատիկային համաձայնագրի վերականգնմանը։ Նրա խոսքով՝ հենց Եվրոպական միությունն է խափանել մի շարք պայմանավորվածությունների իրականացումը, որոնք կարող էին նպաստել գլոբալ սննդամթերքի շուկաների կայունացմանը։
«Եվրամիությունը, որը մշտապես խոսում է իր կվազիհումանիտար մոտեցման մասին, փաստորեն խափանել է այն պայմանավորվածությունները, որոնք թույլ կտային ամենաշատ կարիք ունեցող երկրներին մատչելի գներով սնունդ ձեռք բերել Ռուսաստանից»,- ընդգծել է Ռյաբկովը՝ հավելելով, որ այս իրավիճակը լուրջ խոչընդոտ է միջազգային պարենային անվտանգության ապահովման համար։
Ըստ ռուս դիվանագետի՝ պայմանավորվածությունների խափանումը վնասում է հատկապես այն երկրներին, որոնք մեծապես կախված են հասանելի գնով ռուսական հացահատիկից և այլ պարենային ապրանքներից։
