Բրիտանիան կդադարեցնի Ռուսաստանից ուրանի ներկրումը

Մեծ Բրիտանիան նախատեսում է մինչև 2028 թվականը ամբողջությամբ դադարեցնել Ռուսաստանից ուրանի ներկրումը։ Այս մասին Լոնդոնում Ռուսաստանի դեսպանատունը հայտնել Է «Իզվեստիա» թերթին:

Դիվանագիտական ներկայացուցչությունում նշել են, որ ի սկզբանե Բրիտանական կառավարությունը մտադիր էր ամբողջությամբ դադարեցնել ուրանի ներմուծումը Ռուսաստանից 2030 թվականին, սակայն ԱՄՆ-ի հետ ստորագրված «տեխնոլոգիական բարգավաճման մասին համաձայնագրի» շրջանակներում այդ ժամկետը փոխվել  է մինչև 2028 թվականը:

Ըստ առկա տեղեկությունների՝ խոսքը ոչ թե ԱՄՆ-ից ուրանի ուղղակի մատակարարումների, այլ ֆրանսիական ԷԴՖ ընկերությանը պատկանող միջուկային վառելիքի գնման մասին է, որի ծագումը կապված է Ռուսաստանի հետ:

Ռուսաստանի դեսպանատան հայտարարության մեջ նաև նշվում է, որ Ռուսաստանի հետ առևտրի հարցերում Լոնդոնի մոտեցումներում տնտեսական նպատակահարմարությունը չի դիտարկվում որպես որոշիչ գործոն: