Փաշինյանը 2019-ին թաքցրել է Արցախյան հարցով նոր առաջարկված փաստաթուղթը. Սերժ Սարգսյան

ՀՀ երրորդ նախագահ Սերժ Սարգսյանը «Իմնեմնիմի» փոդքասթի եթերում հայտարարել է, որ շուրջ 8-9 ամիս առաջ ծանոթացել է 2019 թվականին ԵԱՀԿ Մինսկի խմբի համանախագահների կողմից առաջարկված նոր փաստաթղթին, որը, իր խոսքով, վարչապետ Նիկոլ Փաշինյանը թաքցրել է հայ ժողովրդից։

Սարգսյանի խոսքով՝ Հայաստանի կառավարությունը հանրությունից և Արցախի ղեկավարությունից գաղտնի է պահել փաստաթղթի գոյությունը։ Նա նշել է, որ դեռ 2019-2020 թվականներին պարբերաբար տեղեկություններ էր ստացվում դրա մասին, սակայն պաշտոնական աղբյուրները նման փաստաթղթի առկայությունը հերքում էին։

«Ես այդ ժամանակ տեղեկացրել եմ Արցախի ղեկավարությանը, որ նման փաստաթուղթ գոյություն ունի և հորդորել եմ հանդիպել Հայաստանի ղեկավարության հետ՝ պահանջելով այն տեսնել։ Սակայն Արցախի ներկայացուցիչները զարմացել են՝ նշելով, որ չեն լսել դրա մասին»,- նշել է Սարգսյանը։

Նրա խոսքով՝ փաստաթղթի գոյությունը հետագայում հաստատել է նաև Ռուսաստանի արտգործնախարարությունը։ Սարգսյանի գնահատմամբ՝ նույնիսկ այդ տարբերակի հիման վրա հնարավոր էր հասնել հակամարտության կարգավորմանը փոխզիջումների միջոցով, եթե վարեին ճիշտ բանակցային քաղաքականություն։