Ադրբեջանում հիստերիայի մեջ են․ դիմել են Լիտվիայի ԱԳՆ-ին, մեղադրել կողմնապահության մեջ

Բաքուն Լիտվայի ԱԳ նախարարին կոչ է արել չենթարկվել իրենց խոսքով հայկական քարոզչությանը։ Ադրբեջանի արտաքին գործերի նախարարության մամուլի ծառայության ղեկավար Այհան Հաջիզադեն արձագանքել է Լիտվայի արտաքին գործերի նախարար Գաբրիելյուս Լանդսբերգիսի թվիթերյան գրառմանը:

«Հայկական կողմը վերջին 3 տարիներին չարաշահել է Լաչինի ճանապարհը։ Ցավոք, այս բոլոր տարիներին Լիտվան լռություն էր դրսևորում։ Հայաստանի չարամիտ գործողությունները կանխելու նպատակով Ադրբեջանը տեղադրել է Լաչինի անցակետը և առաջարկել Է մատակարարումների համար օգտագործել Աղդամ-Ստեփանակերտ ճանապարհը: Մինչդեռ հուլիսի 6-ի որոշմամբ ՄԱԿ-ի Միջազգային դատարանը միաձայն մերժել է անցակետը հեռացնելու Հայաստանի խնդրանքը:  Ադրբեջանը նպաստում է Հայաստանի բնակիչների տեղաշարժին երկու ուղղություններով։ Ավելի ճիշտ կլիներ Հայաստանին կոչ անել ավելի կառուցողական մոտեցում ցուցաբերել, այլ ոչ թե խաթարել խաղաղ գործընթացը»,- գրել է Հաջիզադեն Twitter-ի իր միկրոբլոգում։ 

Հիշեցնենք, որ այսօր Հայաստանի արտգործնախարար Արարատ Միրզոյանն էր հեռախոսազրույց ունեցել Լիտվայի արտգործնախարարի հետ: Վերջինս մտահոգություն էր  հայտնել  Լաչինի միջանցքի արգելափակման սարսափելի մարդասիրական հետեւանքների վերաբերյալ և նշել էր, որ չափազանց կարևոր է ապահովել անարգել տեղաշարժը: