Իսրայելն արհամարհանքով մերժում է բռնակալ Էրդողանի հերթական PR քայլը. ԱԳՆ

Իսրայելի արտաքին գործերի նախարարությունը Ստամբուլի գլխավոր դատախազության որոշումը՝ Բենիամին Նեթանյահուի և իսրայելցի մի քանի բարձրաստիճան պաշտոնյաների ձերբակալման օրդեր տալու մասին, որակել է որպես «հերթական PR քայլ»՝ արված Գազայի հատվածում ցեղասպանության մեղադրանքի հիմքով։

Նախարարությունում նշել են, որ Էրդողանի կառավարման տարիներին Թուրքիայի դատական համակարգը վերածվել է գործիքի՝ ընդդիմախոսներին ճնշելու և լրագրողների, դատավորների ու քաղաքապետների նկատմամբ բռնաճնշումներ իրականացնելու համար։

Հիշեցվել է նաև, որ նույն Ստամբուլի դատախազությունը վերջերս նախաձեռնել էր քաղաքապետի ձերբակալությունը՝ այն բանի համար, որ նա առաջադրվել էր Էրդողանի դեմ։

«Այժմ Ստամբուլի դատախազությունը ձերբակալման օրդեր է տվել իսրայելցի առաջնորդների ու բարձրաստիճան պաշտոնյաների նկատմամբ։ Իսրայելը վճռականորեն և արհամարհանքով մերժում է բռնակալ Էրդողանի այս հերթական PR քայլը»,– նշված է ԱԳՆ մամուլի ծառայության հաղորդագրությունում։