Չկա Սևանա լիճ, կա Գյոյչա լիճ. Ալիև
Ադրբեջանի նախագահ Իլհամ Ալիևը, ելույթ ունենալով Ադրբեջանի Ազգային գիտությունների ակադեմիայի հիմնադրման 80-ամյակին նվիրված նիստում, հանդես է եկել հայտարարություններով, որոնք ուղղված են Հայաստանի տարածքային ամբողջականությանը։
Ալիևը պնդել է, թե «վերջին տարիներին հայկական կողմը և սփյուռքը խեղաթյուրել են Ադրբեջանի պատմությունը»։ Նա կոչ է արել ադրբեջանցի գիտնականներին «դեմ կանգնել այդ քարոզչությանը»։
Նա նաև ասել է, որ չկա Սևանա լիճ, կա Գյոյչա լիճ:
«Ադրբեջանցիները երբևէ չեն տառապել սեպարատիզմի հիվանդությամբ և միշտ նպաստել են այն երկրների պետականության զարգացմանը, որտեղ ապրել են։ Հետևաբար, ադրբեջանցիների վերադարձը իրենց պատմական հողեր՝ ներկայիս Հայաստանի տարածք, չպետք է վախեցնի հայ ժողովրդին։ Մենք պետք է այնտեղ վերադառնանք ոչ թե տանկերով, այլ մեքենաներով»,- հայտարարել է Ալիևը։
Նա նաև նշել է, որ պետք է ընդլայնել «պատմական քարտեզների ուսումնասիրությունը», պնդելով, թե «հին ռուսական կայսերական քարտեզների վրա ներկայիս Հայաստանի տարածքի տեղանունները ադրբեջանական ծագում ունեն»։
Ալիևը հավելել է, որ այդ քարտեզների ուսումնասիրությունը «պետք է դառնա պետական և գիտական կառույցների առաջնահերթ ուղղություն», քանի որ, ըստ նրա, «դրանք ապացուցում են պատմական իրականությունը»։
