ԱՄՆ-ում արձագանքել են Պուտինի «Բուրևեստնիկ» հրթիռի փորձարկմանը՝ այն անվանելով «սուր ազդանշան» Արևմուտքին

ԱՄՆ-ում հայտարարել են, որ Ռուսաստանի նախագահ Վլադիմիր Պուտինի հայտարարությունը «Բուրևեստնիկ» միջուկային հրթիռի հաջող փորձարկման մասին դիտվում է որպես «սուր ազդանշան» Արևմուտքին։ Այս մասին հայտնում է The New York Times-ը՝ նշելով, որ հրթիռը կարող է կրել միջուկային մարտագլխիկ և շուտով կարող է ներառվել Ռուսաստանի զինանոցում։

Ըստ հրապարակման՝ հրթիռը, որն աշխատում է միջուկային էներգիայով, ունակ է երկարատև թռիչքների և կարող է շրջանցել գործող հակաօդային պաշտպանական համակարգերը։ Գլխավոր շտաբի պետ Վալերի Գերասիմովի զեկույցի համաձայն՝ փորձարկման ընթացքում հրթիռը անցել է շուրջ 14 հազար կիլոմետր և մնացել օդում մոտ 15 ժամ։

Հաջողված փորձարկումից հետո Վլադիմիր Պուտինը հանձնարարել է սկսել «Բուրևեստնիկ» համալիրի ներառման գործընթացը Ռուսաստանի զինված ուժերում՝ ընդգծելով դրա ռազմավարական նշանակությունը։