Մեծ Բրիտանիան վերացնում է Ադրբեջանին և Հայաստանին զենքի մատակարարման էմբարգոն

Մեծ Բրիտանիան ամբողջությամբ վերացնում է Ադրբեջանին և Հայաստանին զենքի մատակարարման էմբարգոն (որևէ բանի արտահանման ու ներմուծության արգելք):

Մեծ Բրիտանիայի խորհրդարանի կայքում հրապարակվել է Եվրոպայի և Հյուսիսային Ամերիկայի հարցերով պետնախարար Սթիվեն Դաութիի հայտարարությունը էմբարգոյի վերացման վերաբերյալ:

«Օգոստոսի 8-ին Վաշինգտոնում կայացել է եռակողմ գագաթնաժողով՝ Թրամփի, Ալիևի և Փաշինյանի մասնակցությամբ։ Արդյունքում նախաստորագրվել է խաղաղության պայմանագիր և ստորագրվել հռչակագիր։

Մեծ Բրիտանիան ողջունում է ձեռք բերված առաջընթացը։ Այդ կապակցությամբ մենք բարձրացնում ենք Հայաստանի և Ադրբեջանի հետ հարաբերությունների մակարդակը մինչև ռազմավարական գործընկերություն առևտրի, անվտանգության և պաշտպանության ոլորտներում։

Մեծ Բրիտանիան ամբողջությամբ վերացնում է զենքի մատակարարման էմբարգոն Հայաստանի և Ադրբեջանի համար։ Դա կօգնի զարգացնել համագործակցությունը անվտանգության ոլորտում և պաշտպանել երկրների ինքնիշխանությունն ու տարածքային ամբողջականությունը, ներառյալ հիբրիդային սպառնալիքներին պատասխան միջոցները»,- նշված է հայտարարության մեջ: