Մոսկվայի և Իրանի միջև ռազմավարական գործընկերության մեկնարկը տրված է․ ՌԴ ԱԳՆ

Պաշտոնապես ուժի մեջ է մտել Ռուսաստանի և Իրանի միջև համապարփակ ռազմավարական գործընկերության մասին պայմանագիրը, որը ստորագրել են Վլադիմիր Պուտինը և Մասուդ Փեզեշքիանը։ Այս մասին հայտնում է Ռուսաստանի Արտաքին գործերի նախարարությունը։

«Այս իրադարձությունը կարևոր հանգրվան է ռուս-իրանական միջպետական հարաբերությունների պատմության մեջ, որոնք հասել են համապարփակ ռազմավարական գործընկերության որակապես նոր մակարդակի: Փաստաթուղթը սահմանում է երկարաժամկետ հեռանկարում երկկողմ համագործակցության բոլոր գերակա ուղղությունների առանցքային ուղենիշները»,- նշված է այդ կապակցությամբ ՌԴ ԱԳՆ հայտարարության մեջ։

Ռուսաստանի արտգործնախարարությունից նշել են, որ ռազմավարական գործընկերության հաստատումը ենթադրում է, որ Մոսկվան ու Թեհրանը կամրապնդեն փոխգործակցությունը և համակարգումը միջազգային ասպարեզում, ինչպես նաև տարածաշրջանում կայունության և անվտանգության ամրապնդմանն ուղղված համատեղ ջանքերը:

Համաձայնագիրն արտացոլում է Ռուսաստանի և Իրանի բարձրագույն քաղաքական ղեկավարության ռազմավարական ընտրությունը՝ հօգուտ բարեկամական, բարիդրացիական հարաբերությունների հետագա համակողմանի ամրապնդման, ինչը համապատասխանում է երկու պետությունների ժողովուրդների շահերին՝ նշել են Ռուսաստանի արտգործնախարարությունից: