Գառնիկ Դանիելյանը՝ Նուբարաշենի աղբավայրի փակման մասին

Ազգային ժողովում «Հայաստան» խմբակցության պատգամավոր Գառնիկ Դանիելյանը բարձրաձայնել է Նուբարաշենի աղբավայրի խնդիրը։

Նրա խոսքով՝ Երևանի և տարբեր մարզերի քաղաքացիներից շարունակաբար ստացվում են բողոքներ աղբավայրը այրելու հետևանքով առաջացած թունավոր ծխի և գարշահոտության մասին։

«Օր առաջ այդ աղբավայրը պետք է փակվի։ Անտանելի են պայմանները, որոնցում ստիպված են ապրում մեր քաղաքացիները։ Ամեն օր շնչում են այդ թունավոր ծուխը, ինչը վնասում է մարդկանց առողջությանը։ Տարիներ շարունակ այս մասին խոսում ենք, բայց որևէ փոփոխություն չի կատարվում»,- նշել է պատգամավորը։

Դանիելյանը հավելել է նաև, որ խնդիրներ կան ոչ միայն աղբավայրի, այլև փակ շրջանառու համակարգի հետ կապված։ Նրա խոսքով՝ օրենսդրական փոփոխությունները լուրջ հարված են հասցնելու ձկնաբուծությանը և տնտեսվարողներին։

«Այս որոշումը ուղիղ ազդելու է ոլորտի զարգացման վրա։ Ավելի ճիշտ կլիներ զբաղվել ապօրինի հորերի հարցով, որոնցից ջուրը գնում է տարբեր ուղղություններով՝ առանց վերահսկողության»,- ասել է «Հայաստան» խմբակցության պատգամավոր Գառնիկ Դանիելյանը։