Իրանի ԶՈՒ-ն հայտարարություն է արել

Իրանի զինված ուժերը հայտարարել են, որ պատրաստ են ներգրավվել երկրում շարունակվող բողոքի ակցիաներին՝ ազգային շահերի և ռազմավարական ենթակառուցվածքների պաշտպանության նպատակով։ Այդ մասին հայտնում է The Wall Street Journal-ը՝ հղում անելով բանակի տարածած հայտարարությանը։

Հայտարարության մեջ նշվում է, որ զինված ուժերը մտադիր են «վճռականորեն պաշտպանել ազգային շահերը, ռազմավարական ենթակառուցվածքները և պետական սեփականությունը»։ Միաժամանակ բանակը ցուցարարների գործողությունների ամբողջ պատասխանատվությունը վերագրել է Իսրայելին, ինչպես նաև որոշ «ահաբեկչական խմբավորումների»։

Հավելենք՝ մինչ այս պահը բողոքների ճնշմամբ զբաղվել են իրավապահ մարմիններն ու որոշ ռազմական կառույցներ։ 

Պաշտոնական աղբյուրները չեն հստակեցրել, թե ինչ պայմաններում և ինչ ծավալով կարող է բանակը ներգրավվել ներքին գործընթացներում։ Իրավիճակի զարգացումների վերաբերյալ լրացուցիչ տեղեկություններ առայժմ չեն հրապարակվել։