Ինչի ենք գնում ուրիշ տեղեր ջրամբար կառուցում. Սուքիասյանը Խուդաթյանին առաջարկ է արել

«Դեպքեր են լինում, ամբողջ աշխարհում էլ այդպես է, երբ չոր եղանակներ են լինում, օգտագործում են ջրամբարները և նման լճերը դրա համար են: Երբ ջրամբարների քանակը կմեծանա, կնվազի նաև Սևանից ջուր վերցնելը»,-այս մասին ԱԺ արտահերթ նիստում իր ելույթում ասել է «Քաղաքացիական պայմանագիր» խմբակցության պատգամավոր Խաչատուր Սուքիասյանը:

Սուքիասյանը ՏԿԵ նախարարին առաջարկ է արել:

«Մենք ձորեր ունենք, որտեղից գետեր են գնում, երկու պատը կա և ռելիեֆներ ունեն, անկում կա: Ի՞նչն է պատճառը, որ շատ տեղերում չենք ուզում՝ օրինակ 2-3 մետրանոց փակենք, թեկուզ՝ Շիրակի դաշտավայրում ենք տեսնում այդ ձորերը՝ գետերը մեջը գնացող՝ կեսը չորացած, կեսը՝ չէ: Ինչի՞ ենք գնում ուրիշ տեղեր ջրամբար կառուցում, հիմա սա շատ արագ կարող ենք անել, ջուրն էլ հենց այդտեղ է, ոչ մի տեղից այլ տեղ տեղափոխել պետք չէ, ուղղակի պետք է կասկադներ կառուցենք, այդ ջրերը մնան, հետո պետք լինի՝ այնտեղից կարող են նասոսով օգտագործել»,- ասել է Սուքիասյանը:

Ավելի վաղ ՏԿԵ նախարարը հանդես էր եկել ելույթով և նշել, որ մտահոգ են Սևանա լճի պահպանության հարցով: