Պուտին-Զելենսկի հանդիպումը պետք է տեղի ունենար դեռ 3 ամիս առաջ. Թրամփ
ԱՄՆ նախագահ Դոնալդ Թրամփը հայտարարել է, որ Եվրոպան կանհետանա առանց ներգաղթի խիստ վերահսկողության: Նա նշել է, որ պետք է անհապաղ դադարեցնել անվերահսկելի ներգաղթը, այլապես Եվրոպա չի մնա:
ԱՄՆ նախագահը՝ ՌԴ նախագահ Պուտինի և Ուկրաինայի նախագահ Զելենսկու հանդիպման մասին է խոսել.
«Այն կկայանա: Դա պետք է տեղի ունենար դեռ 3 ամիս առաջ, բայց դա դեռ տեղի կունենա»:
Թրամփը Եվրոպայի առաջնորդների հետ Շոտլանդիայում կքննարկի Ուկրաինայում պատերազմի դադարեցումը: Ուկրաինայի հետ Ռուսաստանի պատերազմի դադարեցման հարցը կդառնա Թրամփի Շոտլանդիա այցի առանցքային թեմաներից մեկը: Այս մասին էլ գրել է The Guardian-ը: Մասնավոր այցի ընթացքում ԱՄՆ նախագահը հանդիպումներ կունենա Մեծ Բրիտանիայի վարչապետ Քիր Սթարմերի և Եվրահանձնաժողովի նախագահ Ուրսուլա ֆոն դեր Լյայենի հետ:
Վաշինգտոնից մեկնելուց առաջ Թրամփը հայտարարել էր, որ դիտարկում է Ռուսաստանի դեմ լրացուցիչ պատժամիջոցներ սահմանելու հնարավորությունը՝ կապված Ուկրաինայում պատերազմի հետ:
Եվրամիության հետ գործարքի հավանականությունն էլ 50 տոկոս է գնահատել:
«Այսօր ես կհանդիպեմ Եվրամիության ներկայացուցիչների հետ, մենք կաշխատենք համաձայնագրի վրա: Ես չեմ ուզում ասել, թե որոնք են վիճելի կետերը, բայց դրանք վերաբերում են, հնարավոր է, 20 տարբեր հարցերի», - բացատրել Է Սպիտակ տան ղեկավարը:
Նրա խոսքով՝ դա կլինի ամենամեծ գործարքը, եթե ստացվի այն կնքել։
