Իրանը և «եվրաեռյակը» պայմանավորվել են միջուկային ծրագրի շուրջ

Իրանը և եվրոպական եռյակը (Մեծ Բրիտանիա, Ֆրանսիա և Գերմանիա) պայմանավորվել են վերսկսել բանակցությունները միջուկային ծրագրի շուրջ, հայտնում է Tasnim գործակալությունը՝ հղում անելով իր աղբյուրին:

Բանակցությունների անցկացման ժամկետներն ու վայրը քննարկման փուլում են: Նաև դեռ որոշում չի կայացվել, թե որ երկիրն է անցկացնելու առաջիկա բանակցությունները։ Հաղորդվում է, որ բանակցությունների հաջորդ փուլը տեղի կունենա Իրանի, Մեծ Բրիտանիայի, Ֆրանսիայի և Գերմանիայի փոխարտգործնախարարների մակարդակով:

Այս շաբաթ ավելի վաղ հայտնի էր դարձել, որ «եվրակառույցի» արտաքին քաղաքական գերատեսչությունների ղեկավարները պայմանավորվել են վերականգնել Իրանի դեմ ՄԱԿ-ի պատժամիջոցների մեխանիզմը, եթե վերջինս օգոստոսի վերջին միջուկային գործարք չկնքի նրանց հետ: Ֆրանսիայի արտաքին գործերի նախարար Ժան Նոել Բարրոն հայտարարել է, որ Թեհրանը խախտել է 2015թ. միջուկային համաձայնագրի պայմանները, ուստի Փարիզը եւ եվրոպական մյուս երկրները լիովին իրավունք ունեն վերսկսել սպառազինությունների, միջուկային սարքավորումների եւ բանկային ծառայությունների մատակարարման էմբարգոն, որը հանվել էր Իսլամական Հանրապետության նկատմամբ 10 տարի առաջ: