ՔՊ-ում նիստի քննարկմանը ոչ մի միջադեպ չի եղել. Խուդաթյանը՝ Սիմիդյանին ազատելու պատճառների մասին
Շրջակա միջավայրի նախարարի պաշտոնից Հակոբ Սիմիդյանի ազատման որոշումը ինքը կմեկնաբանի, ես մեկնաբանելու անհրաժեշտություն չեմ տեսնում։ Այս մասին, լրագրողների հետ զրույցում հայտնել է ՏԿԵ նախարար Դավիթ Խուդաթյանն՝ անդրադառնալով մամուլի տեղեկություններին, թե պատճառը եղել է այն, որ նա հակաճառել է Նիկոլ Փաշինյանին։
«Այդ հարցերը որոշում է Հանրապետության վարչապետը, այդ որոշումները շատ ժամանակ հանրության համար որոշակի անակնկալ են լինում, բայց այդ որոշումները Հանրապետության վարչապետն է կայացնում։
ՔՊ կուսակցությունում, քննարկումները բաց են, և այդ աշխատանքային պրոցեսում հաճախ է լինում, որ տարբեր կարծիքներ են արտահայտում, բայց որպես այդպիսին ընդգծված ինչ-որ միջադեպ չի եղել։ Բոլորը ազատորեն այնտեղ կարող են արտահայտել և արտահայտում են իրենց դիրքորոշում»,–ասել է Խուդաթյանը։
Խոսելով Գորիսում ՔՊ աշխատանքային ժողովի մասին, Խուդաթյանն նշել է. «Աշխատանքային հարցեր են քննարկվել։ Այդ քաղաքական ժողովի մասով կուսակցությունը նաև համապատասխան հայտարարություն է տարածել, որին ավելացնելու ոչինչ չունեմ։ Այսինքն այն օրակարգն ենք քննարկել, ինչը եղել է տվյալ հայտարարության մեջ»։
Հիշեցնենք` վարչապետ Նիկոլ Փաշինյանի առաջարկությամբ և ՀՀ նախագահ Վահագն Խաչատուրյանի հրամանագրով Հակոբ Սիմիդյանն ազատվել է ՀՀ շրջակա միջավայրի նախարարի պաշտոնից։
