Մակրոնը չի կարող 2027 թվականին առաջադրվել Ֆրանսիայի նախագահ
Ֆրանսիայի նախագահ Էմանուել Մակրոնը հստակեցրել է, որ մտադիր է պահպանել ազդեցությունը երկրի քաղաքականության վրա իր երկրորդ ժամկետի ավարտից հետո՝ չբացառելով Սահմանադրության կողմից թույլատրվող նախագահի պաշտոնում կրկին առաջադրվելու հնարավորությունը։
«Ես դեռ կարիք ունեմ ձեր աջակցությանը, և ապավինում եմ ձեզ՝ առաջիկա երկու տարիների ընթացքում... հինգ տարի անց, տասը տարի անց։ Դուք այստեղ կլինեք, և կարող եք վստահ լինել, որ ես ևս ձեզ հետ կլինեմ», - կիրակի իր առաջին նախագահական ընտրություններում իրեն հաղթել օգնած երիտասարդական շարժման 10-ամյակին նվիրված միջոցառման ժամանակ հայտարարել է Մակրոնը։
Ըստ Ֆրանսիայի սահմանադրության՝ Մակրոնը չի կարող 2027 թվականին առաջադրվել երրորդ անընդմեջ ժամկետով։ Սակայն սահմանափակումը վերաբերում է միայն հաջորդական մանդատներին, ինչը նրան հնարավորություն է տալիս առաջադրվել նախագահի պաշտոնում 2032 թվականին, երբ կլրանա նրա 54-ը։
Թեև մայիսին Մակրոնը խոշոր հեռուստաշոուի ժամանակ հայտարարել է, թե «դեռ չի մտածում» երրորդ ժամկետի մասին, ավելի ուշ պարզվել է, որ կառավարությունը հարցազրույցից մեկ օր անց հասարակական կարծիքի հարցում է պատվիրել՝ գնահատելու համար Մակրոնի հնարավոր թեկնածությանը 2032 թվականին Ֆրանսիայի արձագանքը: Խորհրդարանական հանձնաժողովի տվյալներով՝ նման հարցումները սովորաբար չեն անցկացվում Ելիսեյան պալատի նախաձեռնությամբ, բայց դրանց արդյունքները փոխանցվում են նախագահին:
Ներկայում Մակրոնի նկատմամբ վստահության մակարդակը, ըստ Elabe սոցիոլոգների վերջին տվյալների, երկրում մոտ է պատմական նվազագույնին՝ երկրի կառավարման հարցում ֆրանսիացիների միայն 22%-ն է վստահում նրան։
Նախագահի ներքաղաքական ազդեցությունը ևս թուլացել է անցյալ ամռանը արտահերթ խորհրդարանական ընտրություններ անցկացնելու նրա որոշումից հետո։ Այնուհետև նրա կոալիցիան կորցրեց խորհրդարանի վերահսկողությունը, ինչը հանգեցրեց երկարատև քաղաքական փակուղու։
