Հրանտ Բագրատյանի արդարացման դատավճիռը մնացել է անփոփոխ

Վերաքննիչ քրեական դատարանը Հրանտ Բագրատյանի արդարացման դատավճիռը թողել է անփոփոխ։ Այս մասին ֆեյսբուքյան իր էջում գրել է փաստաբան Հովհաննես Քոչարյանը։

Հիշեցնենք՝ Ավելի վաղ Բագրատյանին մեղադրանք էր առաջադրվել 2023 թվականի ապրիլի 4-ին Հայաստանի Ազգային ժողովի շենքի մոտ «Միասին» շարժման կազմակերպած հանրահավաքում բռնության կոչեր անելու համար։

Իր ելույթում Բագրատյանը, մասնավորապես, ասել էր. «Ձեր ուժով, հզորությամբ հեռացրեք այս իշխանությունը։ Սա ի՞նչ ինքնասպանություն է, որ գործում է ազգը»։

Դատարանը նրան արդարացրել էր այս տարվա մարտի 6-ին։ Մեղադրող կողմը վերաքննիչ բողոք էր ներկայացրել արդարացման վճռի դեմ։