«Լայնածավալ հակամարտություն». ԱԲ-ի չարաշահման հետևանքները՝ ըստ ՄԱԿ ներկայացուցչի

Արհեստական բանականության չարաշահումը կարող է աշխարհում լայնածավալ հակամարտություն հրահրել։ Այս մասին «Россия 24» հեռուստաալիքին տված հարցազրույցում ասել է ՄԱԿ-ի գլխավոր քարտուղարի տեղակալ և տեխնոլոգիաների հարցերով հատուկ ներկայացուցիչ Ամանդիպ Սինգհ Գիլը։

«Միավորված ազգերի կազմակերպությունը ձգտում է յուրաքանչյուր երկրի հնարավորություն տալ ինքնուրույն զարգացնել արհեստական ​​բանականության տեխնոլոգիաները։ Այս պահին արհեստական ​​բանականության զարգացման կենտրոնները անհավասարաչափ են բաշխված, ուստի բնակչության մեծ մասը զրկված է նման տեխնոլոգիաների օգտագործման հնարավոր առավելություններից»,- նշել է նա:

Միևնույն ժամանակ, ՄԱԿ-ի ներկայացուցիչը զգուշացրել է արհեստական ​​բանականության տեխնոլոգիաների ոչ պատշաճ օգտագործման կամ չարաշահման դեպքում հնարավոր ռիսկերի մասին։

Նրա խոսքով՝ արհեստական ​​բանականության չարաշահումը կարող է աշխարհում լայնածավալ հակամարտություն հրահրել, ուստի ՄԱԿ-ը պետք է վերահսկողության տակ պահի արհեստական ​​բանականության հետ կապված իրավիճակը՝ անվտանգ աշխարհ և կայուն զարգացում ապահովելու համար։