ՌԴ-ն ԱԹՍ-ների զանգվածային հարձակման է ենթարկվել
Ռուսական հակաօդային պաշտպանության համակարգերը մեկ գիշերվա ընթացքում երկրի տարածքում ոչնչացրել են Ուկրաինայի զինված ուժերի 115 անօդաչու թռչող սարքեր։ Այս մասին հայտնել է ՌԴ ՊՆ մամուլի ծառայությունը Telegram-ի իր պաշտոնական ալիքում։
Անօդաչու թռչող սարքերի (ԱԹՍ) ճնշող մեծամասնությունը՝ 109-ը, որսացել են Կուրսկի շրջանի երկնքում։ Եվս երեք անօդաչու թռչող սարք է ոչնչացվել Վորոնեժի շրջանում։ Մեկ անօդաչու թռչող սարք է խոցվել Օրյոլի և Բրյանսկի շրջանների օդային տարածքում, ինչպես նաև մայրաքաղաքի շրջանում։
Գերատեսչությունը պարզաբանել է, որ Ուկրաինայի զինված ուժերը հարձակումների համար օգտագործել են ավիացիոն տեսակի անօդաչու թռչող սարքեր։
Ավելի վաղ Կուրսկի շրջանային կառավարությունը հայտնել էր Կուրսկի վրա անօդաչու թռչող սարքերի զանգվածային հարձակման մասին: Արդյունքում մի տարեց կին մահացել է, եւս ինը մարդ վիրավորվել է։ Հրդեհներ են բռնկվել մի քանի բազմաբնակարան շենքերում և առանձնատներում, տուժել է նաև շտապօգնության մեքենան, վնասվել է 11 մեքենա։
Ուկրաինայի զինված ուժերը գրեթե ամեն օր անօդաչու սարքերի միջոցով փորձում են գրոհել Ռուսաստանի սահմանային և կենտրոնական շրջանների թիրախները։ ՀՕՊ ուժերը որսում են հակառակորդի ինքնաթիռները։
Բրյանսկի, Կուրսկի և Բելգորոդի շրջաններում գործում է հակաահաբեկչական գործողության ռեժիմ։
Ուկրաինայից դեռ չեն մեկնաբանում Ռուսական կողմի պնդումը։ Երկու կողմերն էլ հերքում են խաղաղ բնակիչների թիրախավորումը:
