Կիևում սպասում են Ռուսաստանի հարձակմանը. ԶԼՄ

Ուկրաինացի զինվորականներն ու կառավարական վերլուծաբանները սպասում են ռուսական զորքերի հարձակմանը՝ նպատակ ունենալով ուժեղացնել ճնշումը Կիևի վրա և ամրապնդել Մոսկվայի դիրքերը ևս մեկ բանակցություններից առաջ, գրում է Associated Press-ը:

Տարբեր ուղղություններով ռուսական հարձակման նախապատրաստման մասին խոսել է նաև Ուկրաինայի նախագահ Վլադիմիր Զելենսկին՝ ելույթ ունենալով մարտի 27-ին Փարիզում կայացած գագաթնաժողովում: Նա դա կապեց «բանակցությունները ձգձգելու» փորձի հետ։ Կիևում G7 երկրների երկու դիվանագետներ համաձայնել են այդ գնահատականի հետ, գրում է գործակալությունը։

Ռուսաստանի նախագահ Վլադիմիր Պուտինը փետրվարին ասել էր, որ ռուսական զորքեր, առաջ են շարժվում ճակատային գծի ամբողջ երկայնքով:

«Այս շաբաթ, շփվելով «Արխանգելսկ» սուզանավի նավաստիների հետ, Պուտինը հայտարարել է, որ «ռազմաճակատի ողջ գծում ռազմավարական նախաձեռնությունն ամբողջությամբ գտնվում է ռուսական զինված ուժերի ձեռքում: Մեր զորքերը, մեր տղաներն առաջ են գնում և ամեն օր մեկը մյուսի հետևից ազատում են տարածքը, մեկը մյուսի հետևից՝ բնակավայրը», - ասել է նա՝ վստահություն հայտնելով, որ ռուսական ուժերը «կհասնեն» Ուկրաինայի զինված ուժերին:

Նա նաև հայտարարել է, որ Կիևի հետ բանակցությունների տարբերակներից մեկը կարող է դառնալ Ուկրաինայում ՄԱԿ-ի հովանու ներքո ընտրությունների անցկացման համար ԱՄՆ-ի և Եվրոպայի հետ ժամանակավոր կառավարման սահմանումը: «Ժողովրդավարական ընտրություններ անցկացնելու, գործունակ և ժողովրդի վստահությունը վայելող կառավարություն իշխանության բերելու և հետո արդեն նրանց հետ խաղաղության պայմանագրի շուրջ բանակցություններ սկսելու, լեգիտիմ փաստաթղթեր ստորագրելու համար, որոնք կճանաչվեն ամբողջ աշխարհում և կլինեն հուսալի և կայուն», — հայտարարել Է Պուտինը:

Սպիտակ տանը պատասխանել են, որ Ուկրաինայում պետական կառավարումը որոշվում է նրա Սահմանադրությամբ և ժողովրդով։

Մարտի 24-ին Սաուդյան Արաբիայում ԱՄՆ-ը խորհրդակցություններ է անցկացրել ուկրաինական և ռուսական պատվիրակությունների հետ, որոնք Վաշինգտոնը բնութագրել է որպես «անուղղակի բանակցություններ» Կիևի և Մոսկվայի միջև: Սպիտակ տանը հայտարարել են անվտանգ նավագնացության ապահովման, ուժի կիրառումը բացառելու և Սև ծովում ռազմական նպատակներով առևտրային նավերի օգտագործումը թույլ չտալու պայմանավորվածությունների մասին: Ռուսաստանն ու Ուկրաինան պատմել են գործարքի տարբեր պայմանների մասին։ Մոսկվան հայտնել է Սևծովյան հացահատիկային նախաձեռնության իրականացումն ապահովելու պատրաստակամության մասին՝ մի շարք պատժամիջոցների վերացման պայմանով, իսկ Կիևը հայտարարել է, որ ժամանակավոր հրադադարը դրա վերականգնումը չէ: