ԵՄ ընդլայնումը մինչև 2030-ը հնարավոր է. Կայա Կալլասը
ԵՄ արտաքին քաղաքականության ղեկավար Կայա Կալլասը հայտարարել է, որ նոր անդամների միանալը Եվրամիությանը մինչև 2030 թվականը իրական նպատակ է։ Նրա խոսքով՝ հատկապես Չեռնոգորիան և Ալբանիան ամենամոտ են այդ գործընթացի ավարտին։
«Չեռնոգորիան ամենաառաջադեմն է ԵՄ անդամակցության գործընթացում, Ալբանիան աննախադեպ թափ է հավաքում, և երկու երկրներն էլ առաջատար են անդամակցության մրցավազքում», - նշել է Կալլասը Բրյուսելում կայացած մամուլի ասուլիսի ժամանակ։
Նա անդրադարձել է նաև Եվրահանձնաժողովի ընդլայնման զեկույցին՝ ընդգծելով, որ ընդհանուր գնահատականները դրական են Ալբանիայի, Չեռնոգորիայի և Ուկրաինայի համար։ Միևնույն ժամանակ, զեկույցում ընդգծվել են հակասական արդյունքներ Սերբիայի, Հյուսիսային Մակեդոնիայի, Կոսովոյի, Բոսնիա և Հերցեգովինայի ու Թուրքիայի համար, իսկ Վրաստանի ցուցանիշները գնահատվել են բացասական։
