3-ամյա Տիգրանի սպանության կասկածանքով կալանավորվեց հայրը
Ծափաթաղում 3-ամյա երեխայի առերևույթ սպանության գործով կասկածվողը կալանավորվել է: Auroranews.am-ին այս մասին հայտնեցին ՀՀ քննչական կոմիտեից։
ՀՀ ներքին գործերի նախարար Արփինե Սարգսյանի խոսքով՝ նոյեմբերի 3-ին պարզվել է, որ Գեղարքունիքի մարզի Ծափաթաղ գյուղում 3-ամյա երեխային խեղդամահ անելու միջոցով սպանել է նրա հայրը։ Քննչական կոմիտեի հաղորդմամբ՝ փորձաքննությամբ հաստատվել է, որ երեխայի մարմնի և գլխի հատվածներում առկա են եղել վնասվածքներ։ Նույն հաղորդագրությամբ կոմիտեն տեղեկացրել էր նաև, որ երեխայի հորը ձերբակալել են՝ սպանության կասկածանքով։
Հիշեցնենք, որ 2025 թվականի հոկտեմբերի 27-ին ՀՀ ՆԳՆ ոստիկանությունը հայտնել էր՝ որպես անհետ կորած որոնվում է Գեղարքունիքի մարզի Ծափաթաղ գյուղի բնակիչ, 3-ամյա Տիգրան Օվանեսովը։ Մի քանի օր տևած որոնողական աշխատանքներից հետո նոյեմբերի 2-ին ոստիկանությունը տեղեկացրել էր, որ փրկարարները հայտնաբերել են երեխայի դին։
