Ինչ ապագա է սպասում Սիրիայի քրիստոնյաներին. դիտորդները մտահոգ են
Բաշար ալ-Ասադի իշխանության տապալումից հետո անորոշ է Սիրիայում բնակվող քրիստոնյա փոքրամասնության ապագան: Չնայած իշխանությունը ստանձնած իսլամիստները հավաստիացնում են, որ բոլոր մարդկանց իրավունքները կպաշտպանվեն, դիտորդները թերահավատ են։
Սիրիացիները շարունակում են տոնել ալ-Ասադի վարչակարգի տապալումը, որի ընտանիքի ավելի քան 50 տարվա կառավարումն առանձնացավ երկրում չդադարող բռնաճնշումներով, հարյուր հազարավոր մարդկանց սպանություներով ու խոշտանգումներով:
Իրադրությունը, սակայն, Սիրիայում անորոշ է, հատկապես՝ քրիստոնյա փոքրամասնությունների համար։ Խոսքը, բնականաբար, նաև հայկական համայնքի մասին է:
In Defence of Christianity կազմակերպության գործադիր տնօրեն Ռիչարդ Գազելը «Ամերիկայի ձայնի» հետ զրույցում փաստել է՝ Սիրիայի ժողովուրդն այսօր, իրոք, ազատ է, սակայն ինչպես կտնօրինի այդ ազատությունը, անորոշ է:
«Այսօր գլխավոր մարտահրավերը, իհարկե, կառավարություն ստեղծելն է, որը կհամապատասխանի ՄԱԿ-ի 2254 բանաձևին: Այն կոչ է անում ստեղծել սիրիական նոր կառավարություն, որն ակտիվորեն կներգրավի սիրիացի ժողովուրդին, կլինի միասնական և լիովին թափանցիկ միջազգային հանրության համար»,- ասել է նա:
Գազելն, այդուհանդերձ, մտահոգ է՝ երկրում քրիստոնյա փոքրամասնությունների վիճակի հետ կապված:
Այսօր իշխանությունը Սիրիայում կենտրոնանում է իսլամիստների ձեռքին, մասնավորապես՝ «Հայաթ Թահրիր ալ-Շամ» խմբավորման, որն այս օրերին քարոզարշավ է տանում Արևմուտքին մոլորեցնելու, անգամ համուզելու համար՝ նշել է նա:
«Փաստն այն է, որ ոչ մի տարբերություն չկա այս խմբավորման՝ 
Ըստ լրատվամիջոցի զրուցակցի՝ այսօր քրիստոնյա փոքրամասնությունը չի ենթարկվում լայնածավալ բռնության Սիրիայում, քանի որ իշխանություն ստանձնած իսլամիստները փորձում են ներկայանալ աշխարհին որպես լեգիտիմ և օրինական ուժ:
«Մտավախություն ունեմ, որ ժամանակի ընթացքում ականատես կլինենք վարքագծի փոփոխությանը: Ինչպես ասացի՝ այժմ նրանք իրենց լավ են դրսևորում, սակայն կարծում եմ, որ երբ ամրապնդեն իրենց իշխանությունը, դա կամաց-կամաց կփոխվի»,- ասել է նա:
Ըստ Գազելի՝ արդեն իսկ նկատվում են առաջին նշանները, ներառյալ՝ ալկոհոլի օգտագործման արգելքը, հանրային տրանսպորտում կանանց և տղամարդկանց առանձնացումը, Դամասկոսի արվարձաններում զինյալների մոտ «Իսլամական պետության» դրոշի առկայության մասին վկայությունները:
Մանրամասները՝ սկզբնաղբյուր կայքում:
