ՏԵՍԱՆՅՈՒԹ. «Արտագաղթել է խաշ կամ քյաբաբ չսիրելու պատճառով». Փաշինյան

Բարեկեցության մեջ մտնում է ազատությունը. Ես առնվազն մի քանի դեպք տեսել եմ եվրոպական հյուրանոցներում, երբ ասենք, թեյ կամ սուրճ ես պատվիրում, մեկ էլ գալիս է ինչ-որ մի մատուցող եւ սկսում է հայաստանյան հայերենով շփվել: Այս մասին, այսօր՝ հոկտեմբերի 17-ին, կառավարության նիստում Հայաստանի Հանրապետության ժողովրդագրական իրավիճակի բարելավման 2024-2040 թվականների ռազմավարության հարցի քննարկման ժամանակ նշեց վարչապետ Նիկոլ Փաշինյանը:

«Ասում ես՝ ո՞վ ես, ի՞նչ ես, բնականաբար հարց է ծագում, բա ինչի՞ ես արտագաղթել, ի՞նչն է պատճառը, Երևանում հյուրանոցում մատուցողի տեղ չկա՞ աշխատելու, որ եկել ստեղ ես աշխատում: Հետո պարզվում է, որ մեկն արտագաղթել է սանրվածքի պատճառով, մեկը՝ ականջին օղ կախելու պատճառով, մեկը արտագաղթել է այն պատճառով, որ խաշ չի սիրում, մյուսը՝ քյաբաբ չի սիրում և սրանից բխող այլ հետևանքներ: Այս թեմաների հետ որ չառնչվեք, այդպես էլ չենք հասկանալու արտագաղթ երևույթը: Մենք չունենք պատկերացում արտագաղթի մասին»,- ասաց Փաշինյանը:

Փաշինյանի խոսքով՝ մենք չունենք ամբողջական պատկերացում արտագաղթի մասին. «Մենք անընդհատ կենացներ ենք ասում՝ Սփյուռքը գա, Սփյուռքի ներուժը, ընենց անենք գան, ինչի՞ համար գան: Կներեք էլի էդ ո՞վ է Բրյուսելում իր հանդարտ կյանքը թողնելու, գնա ապրի Մովսես գյուղում՝ կրակոցների տակ, ո՞վ, համենայանդեպս ցույց տվեք 15-20 նման դեպք: Մենք պետք է առերեսվենք այս խնդիրների հետ»:

Կառավարության ղեկավարը նաև նկատեց, որ արդարությունն է նաև ժողովրդագրության անբաժանելի մաս է. «Որովհետև մարդը մեկ, երկու, երեք, չորս անարդարության բախվելով, ասում է եթե իմ երկրում, իմ տանը չեմ կարողանալու իմ իրավունքները պաշտպանել, ես ի՞նչ ունեմ ինձ կապող այս երկրի հետ. ժողովրդավարությունը՝ օրինականությունն է, կարգուկանոնը, իրավակագն է, անվտանգությունը՝ ներքին և արտաքին:

Վախենամ մենք ժողովրդագրություն ասելով սովորույթի համաձայն կարող է հասկանանք միայն ծննդաբերություն»,- հայտարարեց Նիկոլ Փաշինյանը: