Մոսկվացուն դանակահարած Ադրբեջանի քաղաքացու տանը խոշոր գումար է հայտնաբերվել

ՌԴ Քննչական կոմիտեն հայտնում է, որ Մոսկվայի հարավ-արևելքում Ադրբեջանի քաղաքացու կողմից երիտասարդի սպանության դեպքի առթիվ հարուցված քրեական գործի շրջանակներում մայրաքաղաքի քննչական կոմիտեի քննիչները անհետաձգելի քննչական գործողություններ են իրականացրել։ 

Այսօր գիշերը 21-ամյա Շահին Աբասովի բնակարանում խուզարկության ժամանակ հայտնաբերվել և առգրավվել է մեծ քանակությամբ կանխիկ գումար՝ ավելի քան 44 մլն ռուբլի և 300 հազար ԱՄՆ դոլար։ Նշվում է, որ հետաքննությունը կհաստատի դրանց պատկանելությունը, ինչպես նաև կգնահատի ստացման և շրջանառության օրինականությունը։

Հաղորդվում է, որ Աբասովի նկատմամբ հետախուզում է հայտարարվել։

Քննիչների տվյալներով՝ չորեքշաբթի օրը Ադրբեջանի 21-ամյա քաղաքացին մեքենան կայանել է Մոսկվայի Կրասնոդարսկայա փողոցի տներից մեկի մուտքի մայթին։ Սա առաջացրել է տեղի 24-ամյա բնակչի դժգոհությունը, ով նկատողություն է արել վարորդին։ Արդյունքում 21-ամյա երիտասարդը հարձակվել է մոսկվացու վրա, ծեծի ենթարկել նրան, ապա դանակով հարվածել ստամոքսին։ Ստացած վնասվածքներից տղամարդը հիվանդանոցում մահացել է, հանցագործը դիմել է փախուստի: