Ղազախստանը 139 խաղաղապահ է ուղարկել Գոլանի բարձունքներ
Ղազախստանի իշխանությունները 139 զինծառայողներից բաղկացած խաղաղապահ զորախումբ են ուղարկել Գոլանի բարձունքներում ՄԱԿ-ի դիտորդական առաքելություն, որի խնդիրն է հետևել Իսրայելի և Սիրիայի միջև հրադադարի պահպանմանը։ Այս մասին հաղորդագրություն է տարածել Ղազախստանի պաշտպանության նախարարությունը, փոխանցում է ՏԱՍՍ-ը:
Երկրի պաշտպանության նախարար, գեներալ-գնդապետ Ռուսլան Ժակսիլիկովը նշել է, որ ՄԱԿ-ի առաքելություններում ղազախստանցի խաղաղապահների մասնակցության աշխարհագրության ընդլայնումն ու դիվերսիֆիկացումն իրականացվում է նախագահի հանձնարարականով։
Խաղաղապահների հետ հրաժեշտի արարողությունը տեղի է ունեցել Ալմաթիի Պանֆիլովյան 28 գվարդիականների այգում։ Գոլանի բարձունքներ են ուղարկվել 139 զինծառայողներ, որոնք առաքելության մանդատին համապատասխան կկատարեն հակամարտող կողմերի միջև հրադադարի ռեժիմի պահպանման խնդիրներ։
«Սա մեծ պատիվ է մեզ համար, մենք կարճ ժամանակահատվածում պատրաստել և վերազինել ենք խաղաղապահ զորախումբը, որը համապատասխանում է բոլոր միջազգային չափանիշներին և պահանջներին, պատրաստ է կատարել առաջադրանքները ռազմաքաղաքական իրադրության հատուկ պայմաններում»,-արարողության ժամանակ հայտարարել է Ղազախստանի պաշտպանության նախարար Ռուսլան Ժակսիլիկովը:
