Ռուսաստանի ԱԳՆ-ն պատասխանել Է Եվրամիության պատժամիջոցների 13-րդ փաթեթին

Ռուսաստանի ԱԳՆ-ն այսօր՝ փետրվարի 23-ին ընդունված Եվրամիության պատժամիջոցների 13-րդ փաթեթն անօրինական է համարում։ Ի պատասխան նոր սահմանափակումների՝ ԱԳՆ-ն ընդլայնել է եվրոպական երկրների քաղաքացիների սև ցուցակը, որոնց մուտքը Ռուսաստան արգելված է:

Հայտարարության մեջ ասվում է, որ ի պատասխան ԵՄ պատժամիջոցների՝ Ռուսաստանը կարգելի Եվրամիության երկրների ուժային գերատեսչությունների ներկայացուցիչների մուտքը երկիր, նրանց, ովքեր ներգրավված են ռուս պաշտոնյաների «հետապնդմանը», հանդես են գալիս ռուսական ակտիվների բռնագրավման օգտին, աջակցում են պատժամիջոցներին և փորձում են «խաթարել Ռուսաստանի հարաբերություններն այլ պետությունների հետ»:

Հիշեցնենք՝ ավելի վաղ հայտնել էինք որ ԵՄ–ի Ռուսաստանի դեմ պատժամիջոցների նոր` 13-րդ փաթեթը ներառում է 194 ֆիզիկական և իրավաբանական անձ, պատժամիջոցների ենթարկված անձանց ընդհանուր քանակը գերազանցել է 2 հազարը։