Ադրբեջանը` ՀՀ-ի վրա նոր հարձակման հնարավորության վերաբերյալ Փաշինյանի հայտարարության մասին
«Ֆրանսիական France 24 հեռուստաալիքին տված հարցազրույցում Հայաստանի վարչապետ Նիկոլ Փաշինյանի կողմից Ադրբեջանի դեմ կրկին առաջադրված անհիմն մեղադրանքները միտումնավոր լարվածություն են ստեղծում տարածաշրջանում և ուղղված են խաղաղ գործընթացի հերթական խափանմանը»: Այս մասին ասվում է Ադրբեջանի ԱԳՆ հաղորդագրության մեջ:
Նշվում է. «Այն պնդումները, թե Ադրբեջանը պատրաստվում է հարձակվել Հայաստանի վրա, չեն համապատասխանում միջազգային իրավունքի սկզբունքներին, առկա փաստերի ակնհայտ խեղաթյուրում են և նպատակ ունեն մոլորեցնելու միջազգային հանրությանը»:
«ՀՀ վարչապետի հայտարարությունները Գերմանիայի կանցլերի նախաձեռնությամբ տեղի ունեցած հանդիպումից հետո և Ֆրանսիայի՝ որպես դրա վայր ընտրելը, ՀՀ-ի կողմից Գերմանիայի ջանքերի նկատմամբ անհարգալից վերաբերմունք է»,-ասվում է հայտարարության մեջ:
Հիշեցնենք` ավելի վաղ Նիկոլ Փաշինյանը France 24-ին տված հարցազրույցում հայտարարել է, որ վերլուծելով պաշտոնական Բաքվից հնչող հայտարարությունները՝ գալիս են այն եզրակացությանը, որ նոր հարձակումը Հայաստանի վրա հավանական է։
