Ինքս այդտեղ երկար տարիներ թենիս եմ պարապել․ Ավինյանը՝ Օղակաձև այգու 4-րդ հատվածի մասին
Օղակաձև այգու 4-րդ հատվածը կվերակառուցվի։ Այս մասին Երևանի քաղաքապետարանի գործակարգավորական նիստին ասաց քաղաքապետ Տիգրան Ավինյանը։
Ավինյանի խոսքով՝ այդ տարածքը կառուցապատված է խառը, և նախագծով առաջարկվում է այգին վերականգնել։
«Ինքս այդտեղ երկար տարիներ թենիս եմ պարապել․ ինձ համար այն ժամանակ միգուցե տարօրինակ չէր, բայց հիմա երբ նայում ենք, օղակաձև այգու տրամաբանությամբ թենիսի կորտեր չպետք է լինեին, ու այգին պետք է լիներ այգի։ Հետևաբար, հատվածներում, որտեղ հանրային կանաչ տարածքներ են, պետք է վերադարձնենք քաղաքին, երևանցիներին»,- ասել է նա՝ հանձնարարելով ավելի արագացնել կառավարության որոշման նախագծի պատրաստումը։
Auroranews-ին քաղաքապետարանից հայտնեցին, որ այս ամենը դեռ քննարկում է: Ինչ դիրքորոշում կլինի, դեռ պարզ չէ: Վաղը չեն գնալու եւ կորտերը ապամոնտաժեն: Մեր լրատվականը հետեւելու է այս քննարկումներին:
