Ուկրաինայի ԶՈՒ-ն գնդակոծել է Բելգորոդը. իրավիճակը լարված է

Բելգորոդի մարզի նահանգապետ Վյաչեսլավ Գլադկովն իր Telegram-ալիքում հայտնել է, որ ուկրաինացի զինվորականներն այսօր առավոտյան երկու անգամ գնդակոծել են Բելգորոդ քաղաքը, նա քաղաքում իրավիճակը «լարված» է անվանել: Տեղեկությունը փոխանցում է ՌԻԱ Նովոսին:

«Բելգորոդում իրավիճակը շարունակում է լարված մնալ, առավոտից երկու գնդակոծություն է եղել, հակաօդային պաշտպանությունն աշխատել է: Լուսադեմին տնետուն ստուգումներ կանենք, կնայենք վնասները, տանիքները, պատուհանները և կսկսենք վերականգնման աշխատանքները»,- գրել է Գլադկովը։

Նա հավելել է, որ տարածքի շրջայցը կիրականացվի քաղաքապետի և մարզային նախարարների հետ միասին:

«Անպայման կհայտնեմ այն ավերածությունների մասին, որոնք կան, այն միջոցների մասին, որոնք մենք ձեռնարկում ենք», - ընդգծել է մարզի ղեկավարը:

Գլադկովն իր Telegram-ի ալիքում հայտնել է նաև, որ Բելգորոդում հրթիռային հարձակման տագնապի ազդանշան է արձակվել:

«Եթե տանն եք, մի մոտեցեք պատուհաններին։ Պատսպարվեք ամուր պատերով առանց պատուհանների սենյակներում (միջանցք, լոգարան, զուգարան, մառան): Եթե ​​փողոցում եք, գնացեք ապաստարան կամ այլ ապահով տեղ»,- գրել է նա։

Նահանգապետը բնակիչներին հիշեցրել է, որ գնդակոծությունների մասին արագ տեղեկացնելու համար նրանք կարող են իրենց հեռախոսներում տեղադրել Ռուսաստանի ԱԻՆ հավելվածը:

Ինչպես տեղեկացրել է Գլադկովը` չորեքշաբթի առավոտյան Բելգորոդի և Բելգորոդի շրջանի վրա գործարկվել է հակաօդային պաշտպանության համակարգը, խոցվել են մի քանի օդային թիրախներ քաղաքին մոտենալիս:

Նշենք, որ դեկտեմբերի 30-ին Բելգորոդի` ուկրաինական զինված ուժերի գնդակոծությունից հետո 70 տուժածներ մնում են հիվանդանոցներում:

Բելգորոդի մարզի նահանգապետ Վյաչեսլավ Գլադկովը հայտնել է, որ Ուկրաինայի զինված ուժերի կողմից տարածաշրջանի գնդակոծություններից հետո, որը ավելի քան 20 մարդու կյանք խլեց, հիվանդանոցներում մնում է 70 մարդ, նրանցից մի քանիսի վիճակը ծանր է: