Այս հանցագործությունը երբեք անպատասխան և անպատիժ չի մնա. «Հըզբոլլահ»
Լիբանանյան «Հըզբոլլահ» շարժումը խոստանում է արձագանքել ՀԱՄԱՍ-ի քաղաքական բյուրոյի փոխնախագահ Սալեհ Ալ-Արուրիի մահվանը, հաղորդում են մերձավորարևելյան լրատվամիջոցները: Տեղեկությունը փոխանցում է interfax.ru-ն:
«Մենք վերահաստատում ենք, որ այս հանցագործությունը երբեք անպատասխան և անպատիժ չի մնա», - ասված է կազմակերպության տարածած հայտարարության մեջ:
Փաստաթղթում նաև ընդգծվում է, որ նրա մարտիկները գտնվում են պատասխան գործողությունների պատրաստվածության բարձր աստիճանի մեջ ։
«Հըզբոլլահ»-ը Բեյրութի հարավային արվարձանում պաղեստինյան ՀԱՄԱՍ խմբավորման գրասենյակի ուղղությամբ անօդաչու թռչող սարքի հարվածը, որի հետևանքով զոհվել Է Ալ-Արուրին, անվանել է լուրջ հարձակում Լիբանանի, նրա ժողովրդի, նրա անվտանգության և ինքնիշխանության վրա և պատերազմի ընթացքում իրադարձությունների վտանգավոր զարգացում:
Ֆրանսիայի նախագահ Էմանուել Մակրոնը կոչ է արել Իսրայելի իշխանություններին խուսափել այնպիսի գործողություններից, որոնք կարող են հանգեցնել հակամարտության շրջանակի ընդլայնմանը, ինչի մասին հայտնել Է Ելիսեյան պալատը:
Մակրոնը Իսրայելի ռազմական կաբինետի անդամ Բենի Գանցի հետ հեռախոսազրույցում հայտարարել է, որ կարևոր է խուսափել ցանկացած էսկալացիայից, հատկապես Լիբանանում:
Իրանի ԱԳՆ պաշտոնական ներկայացուցիչ Նասեր Քանաանին հայտարարել է, որ Թեհրանում դատապարտում են Իսրայելի կողմից Սալեհ Ալ-Արուրիի «ստոր սպանությունը»:
Միևնույն ժամանակ, Իսրայելը դեռ պաշտոնապես չի հայտարարել, որ Իսրայելի պաշտպանության բանակը (ՑԱԽԱԼ) հարված է հասցրել, որը հանգեցրել Է ՀԱՄԱՍ-ի առաջնորդի մահվան: ՑԱԽԱԼ-ի պաշտոնական ներկայացուցիչ Դանիել Հագարին ճեպազրույցի ժամանակ հայտարարել է, որ բանակը շատ բարձր մակարդակի վրա է:
«Մենք բարձր պատրաստության վիճակում ենք ցանկացած սցենարի համար»,- ընդգծել է Հագարին, սակայն չի հիշատակել Ալ-Արուրիի մահը:
«Ամենակարևոր բանը, որ ես ուզում եմ ասել, այն է, որ մենք կենտրոնացած ենք և կենտրոնացած ենք մնում ՀԱՄԱՍ-ի դեմ պայքարի վրա», - հավելել է նա:
