Դեկտեմբերի 14-ի գիշերը ՌԴ զորքերը հարձակվել են Ուկրաինայի վրա «Շահեդ-136/131» հարվածային անօդաչու թռչող սարքերով և Ս-300 զենիթային կառավարվող հրթիռներով: Տեղեկությունը փոխանցում է meduza-ն։

Ուկրաինայի զինված ուժերի հրամանատարության տվյալներով՝ կեսգիշերին մոտ վեց հրթիռ է արձակվել Նիկոլաևի և Խերսոնի շրջանների ուղղությամբ։

Դրոնները երեք ալիքներով արձակվել են Օդեսայի մարզի ուղղությամբ։ ՀՕՊ միջոցները ոչնչացրել են Ուկրաինայի վրա հարձակված 42 անօդաչու թռչող սարքերից 41-ը, հայտարարել են Ուկրաինայի զինված ուժերում:

Ուկրաինայի արտակարգ իրավիճակների պետական ծառայությունը հայտնում է, որ Օդեսայի մարզում գնդակոծությունների հետևանքով արձանագրվել է տնտեսական կառույցի մեջ ընկնելու դեպք: Մոտակայքում այրվել է նաև մարդատար ավտոմեքենա, ևս 11 շինություն վնասվել է:

Պայթյունի վայրում տուժել է 11 մարդ։ Բուժծառայության աշխատակիցների զննումից հետո հիվանդանոցներ են տեղափոխվել հինգ վիրավոր, այդ թվում՝ երեք երեխա:

Հրթիռային հարվածների հետևանքների մասին Ուկրաինայի իշխանությունները դեռ ոչինչ չեն հայտնել:

Օդեսայի մարզում Ուկրաինայի արտակարգ իրավիճակների պետական ​​ծառայության գլխավոր վարչությունը տարածել է նաև տեսանյութ և լուսանկարներ։