Երևանում խուլիգանություն կատարած Յուլիա Ֆինեսը քննչականի զուգարանի պատուհանից փախուստի փորձ է կատարել

Հայաստանի քննչական կոմիտեի Երևանի քննչական վարչության Էրեբունի և Նուբարաշեն վարչական շրջանների քննչական բաժնից փախուստի դիմելիս՝ մարմնական վնասվածքներ է ստացել ՌԴ քաղաքացի 19-ամյա Յ․ Մ-ն: Այս մասին հաղորդագորություն է տարածել ՔԿ-ն։

«ՀՀ ՔԿ ԵՔՔՎ Էրեբունի և Նուբարաշեն վարչական շրջանների քննչական բաժնում քննվող քրեական վարույթով իրականացվող նախաքննության շրջանակներում, 2023 թվականի դեկտեմբերի 12-ին, ձերբակալված անձի և նույն քրեական վարույթով տուժող, ՌԴ քաղաքացի Յու․ Մաքսիմովսկայայի միջև տեղի է ունեցել առերես հարցաքննություն, որի ավարտից հետո՝ ժամը 21:30-ի սահմաններում, Յու. Մաքսիմովսկայան խնդրել է գնալ զուգարան։ Վերջինիս քննիչը ուղեկցել է քննչական բաժնի աղջիկների համար նախատեսված զուգարան և սպասել դռան դիմաց:

Մտնելով ներս՝ Յ. Մաքսիմովսկայան զուգարանում առկա փոքր պատուհանից փորձել է դիմել փախուստի և ընկել ՀՀ ՆԳՆ ոստիկանության՝ ձերբակալված անձանց պահելու վայրի զբոսանքի համար նախատեսված հատվածում առկա ցանցե տանիքին՝ ստանալով մարմնական վնասվածք»,-ասվում է հաղորդագրության մեջ:

Հաղորդվում է, որ Յու.Մաքսիմովսկայան տեղափոխվել է Էրեբունի բժշկական կենտրոն: Համաձայն բժշկական հաստատությունից ստացված տեղեկանքի՝ վերջինիս մոտ ախտորոշվել է L2 և L3 ողերի մարմինների կոմպրեսիոն կոտրվածք:

«Դեպքի առթիվ 2023 թվականի դեկտեմբերի 12-ին ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 44-506-րդ հոդվածի 1-ին մասով նախաձեռնվել է քրեական վարույթ:

Կատարվել է դեպքի վայրի զննություն»,-ասվում է ՔԿ հաղորդագրության մեջ:

Հիշեցնենք՝ ավելի վաղ, ՀՀ քննչական կոմիտեն հայտնել էր, որ դեկտեմբերի 9-ին՝ ժամը 00:23-ին, քաղաքացու ահազանգով ձեռնարկված միջոցառումների արդյունքում պարզվել է, որ ՌԴ քաղաքացի Կ.Ա. եւ Յու.Մ.-ն դեկտեմբերի 8-ին՝ ժամը 22:00-ից 23:00-ն ընկած ժամանակահատվածում, համակեցության կանոնների բացահայտ անտեսումով, դրսևորել են անհարգալից վերաբերմունք հասարակության նկատմամբ և ցուցաբերել են բարոյական չափանիշների բացահայտ անտեսում։ Մասնավորապես, վնասել են Երևանի Թումանյան 29 հասցեում գտնվող արագ սննդի կետի գույքը, մրգեր են նետել աշխատակցի վրա, թափել և տրորել Մաշտոցի 24 հասցեում գործող ծաղկի խանութի ծաղիկները՝ ուղեկցելով այս գործողությունները անպարկեշտ բառապաշարով։ Նախաձեռնվել է քրեական վարույթ մի խումբ անձանց կողմից խուլիգանություն կատարելու հատկանիշներով։