Դատարանը որոշել է վտարել «Անմար կրակը» ձյունով հանգցրած երեխաներին ու նրանց ծնողներին․ ՌԴ

Սանկտ Պետերբուրգի Կրասնոսելսկի շրջանային դատարանը որոշում է կայացրել վտարել «Անմար կրակը» ձյունով հանգցրած երեխաներին ու նրանց ծնողներին։ Այս մասին РБК-ի փոխանցմամբ՝ հայտնում է քաղաքային դատարանների միասնական մամուլի ծառայությունը։

Ինչպես լրատվամիջոցին հայտնել են ՌԴ ՆԳՆ Սանկտ Պետերբուրգի և Լենինգրադի շրջանի գլխավոր տնօրինության մամուլի ծառայությունից, դատարանը պաշտպանել է ոստիկանության՝ երկու ընտանիքներին վտարելու միջնորդությունը։

Հաղորդվում է, որ «Անմար կրակը» հանգցրած 11-ամյա երեխան գտնվում է ոստիկանության անչափահաս իրավախախտների ժամանակավոր պահման կենտրոնում։ Բացի արտաքսումից, բոլորին տուգանել են 5 հազար ռուբլու չափով։

Ավելի վաղ հայտնել էինք, որ Սանկտ Պետերբուրգում երեխաները հանգցրել են «Անմար կրակ»-ը։ Ոստիկանությունը պարզել էր, որ միջադեպին մասնակցել են 10-ից 14 տարեկան երեք դեռահասներ, որոնցից մեկը մարել է «Անմար կրակը»՝ ձնագնդի նետելով դրա վրա։ Այս դեպքը ֆիքսվել է փողոցային հսկողության տեսախցիկներով։