Ալիևը՝ Ադրբեջանի և Հայաստանի միջև վստահության ամրապնդման մասին

Ադրբեջանի նախագահ Իլհամ Ալիևը՝ Եվրոպայի խորհրդի գլխավոր քարտուղար Մարիա Պեյչինովիչ Բուրիչի հետ Բաքվում հանդիպմանը, հայտարարել է, որ Եվրոպայի խորհուրդը շատ լավ հարթակ է Ադրբեջանի և Հայաստանի միջև վստահության ամրապնդման համար։

Ալիևը նախօրեին հրապարակված Ադրբեջանի նախագահի աշխատակազմի և Հայաստանի վարչապետի գրասենյակի համատեղ հայտարարությունը որակել է որպես փոխադարձ քաղաքական կամքի դրսևորում՝ նպաստելու փոխադարձ խաղաղության օրակարգին և կարգավորելու Բաքվի և Երևանի միջև հարաբերությունները:

Մարիա Պեյչինովիչ Բուրիչը նշել է, որ «բարձր է գնահատում Ադրբեջանի նախագահի վարչակազմի և Հայաստանի վարչապետի աշխատակազմի համատեղ հայտարարությունը և մասնավորապես՝ վստահության ամրապնդմանն ուղղված քայլերը»։

Վերջինս ընդգծել է, որ Եվրոպայի խորհուրդը պատրաստ է նպաստել Ադրբեջանի և Հայաստանի միջև վստահության հաստատման գործընթացին։

Հիշեցնենք՝ երեկ հայտարարություն տարածվեց, որ Ադրբեջանը գերեվարված 32 հայի է վերադարձնելու Հայաստանին 2 ադրբեջանցու դիմաց։