Որն է Երևանում կայանատեղիների վարձավճարների բարձրացման պատճառը. փոխքաղաքապետը մանրամասնում է

Երևանի փոխքաղաքապետ Սուրեն Գրիգորյանի գլխավորությամբ անցկացվել է հանրային քննարկում։ Թեման Երևանում կայանատեղիների վարձավճարներին առնչվող նոր նախագիծն է։

Գրիգորյանը նշեց, որ գլխավոր նպատակը Կենտրոնի բեռնաթափումն է։ Հարցին՝ միջազգային փորձն ուսումնասիրվե՞լ է, փոխքաղաքապետը նշեց. «Միջազգային փորձի մաս է կազմում առհասարակ որևէ հատվածում կայանումն արգելելը, միջազգային փորձի մաս է կազմում որևէ հատվածում, օրինակ, 2 ժամից ավել, գումար չվճարելով, չկայանելը։ Երբ ասում եք՝ միջազգային փորձ, դրանից բխում են շատ ավելի խիստ կարգավորումներ»,- ասաց նա։

Գրիգորյանը նաև ներկայացրել է նախատեսված փոփոխությունների հիմնավորումները. «Սա գործադիրի կողմից առաջարկվող փոփոխություն է, որը դեռ պետք է ավագանու կողմից ընդունվի, մերժվի կամ ընդունվի որոշակի փոփոխություններով։ Մեր նպատակը բյուջեի հավաքագրումները բարձրացնելը չէ։ Այսինքն, մեկնաբանությունները, թե նպատակն ավել փող հավաքելն է, սխալ է․ նպատակը փոքր Կենտրոնի բեռնաթափումն է»,- ասաց նա։

Գրիգորյանն ուշադրությունը հրավիրեց այն հանգամանքի վրա, որ Կենտրոնում երթևեկությունը, խցանումներն օրեցօր ավելանում են, և հասարակական տրանսպորտից աշխատանքի դժգոհությունը նաև դրա հետևանք է։