Ավարտը կարող է տարբեր լինել, ոմանց այն կարող է դուր գալ, ոմանց՝ ոչ․ Զելենսկի
Ուկրաինան չի կարող իրեն թույլ տալ Ռուսաստանի հետ հակամարտության «սառեցում», այն պետք է ավարտել։ Նման կարծիք է հայտնել Ուկրաինայի նախագահ Վլադիմիր Զելենսկին աֆրիկյան ԶԼՄ-ների ներկայացուցիչների հետ հանդիպման ժամանակ։ Հանդիպման ձայնագրությունը տեղադրվել է Զելենսկու ֆեյսբուքյան էջում։ Տեղեկությունը փոխանցում է ՏԱՍՍ-ը։
«Լսեք, եկեք Մինսկի ինչ-որ համաձայնագրեր ստորագրենք, սառեցնենք հակամարտությունը»,- ասել է նա՝ մեկնաբանելով լրագրողներից մեկի խոսքերը հակամարտության սառեցման հնարավորության մասին։
«Մեզ մոտ նման փակուղի է։ Ոչ ոք ոչ մի տեղ չի կարող շարժվել: Փորձենք այսպես ապրել: Մենք բոլորս ապրում էինք Ուկրաինայում, և բոլորը հասկացան, որ միևնույն է, սա պատերազմ է»,- նշել է Զելենսկին:
Երկրի նախագահը հավելել է, որ նույնիսկ սառեցված հակամարտությունը կնշանակի կորուստներ Ուկրաինայի համար, որոնք կպահպանվեն երկար ժամանակ, և ցանկացած պահի հակամարտության վերսկսման հնարավորություն:
«Մենք խաղաղություն ենք ուզում։ Ավարտը կարող է տարբեր լինել, ոմանց այն կարող է դուր գալ, ոմանց՝ ոչ, բայց դա անհրաժեշտ է»,- ընդգծել է նա։
Միևնույն ժամանակ Զելենսկին նշել է, որ կցանկանար հակամարտության ավարտը տեսնել Ուկրաինական պայմաններով:
Վերադառնալով հակամարտության սառեցման թեմային՝ Զելենսկին հավելել է՝ «մենք չենք կարող մեզ թույլ տալ, որքան էլ մեզ համար դժվար լինի, նույնիսկ նման միտք»։
