Հայ գերու դեմ հարուցված քրգործի նյութերն Ադրբեջանն ուղարկել է ծանր հանցագործությունների դատարան
Ադրբեջանում ավարտվել է այս տարվա օգոստոսին օկուպացված Քարվաճառում կալանավորված պահեստազորային Գագիկ Ոսկանյանի դեմ հարուցված քրեական գործի նախաքննությունը։ Այս մասին հայտնում են ադրբեջանական լրատվամիջոցները։
Քրեական գործի վերաբերյալ նյութերն ուղարկվել են ծանր հանցագործությունների դատարան։ Ավելի վաղ Ադրբեջանի դատախազությունը հայտնել է պահեստազորային Գագիկ Ոսկանյանի հետ կապված քրեական գործ հարուցելու և նրան կալանավորելու մասին։
Դեռ Օգոստոսի 16-ին ՀՀ պաշտպանության նախարարությունը հայտնել էր, որ պահեստազորայինը, նախնական տվյալներով, ինքնակամ թողել է մարտական դիրքը:
Օգոստոսի 18-ին ադրբեջանական դատարանն ապօրինի կալանավորել է Ոսկանյանին։ Ադրբեջանն իր ավանդական ոճով մի քանի հոդվածներով քրեական գործ է սարքել Ոսկանյանի, ինչպես նաև այլ հայ գերիների նկատմամբ:
