Թուրքիայում կրկնել են, որ ՀԱՄԱՍ-ին ահաբեկչական կազմակերպություն չեն համարում
Թուրքիայի արտգործնախարար Հաքան Ֆիդանը հայտարարել է, որ Թուրքիան պաղեստինյան ՀԱՄԱՍ շարժումը ահաբեկչական կազմակերպություն չի համարում, սակայն դա չի նշանակում, որ Անկարան խրախուսում է անմեղ մարդկանց մահը: Փոխանցում է ՌԻԱ Նովոստին։
Երկրի արտգործնախարարի խոսքով՝ Անկարան ՀԱՄԱՍ-ին դիտարկում է որպես քաղաքական կուսակցություն պաղեստինյան պետության համակարգում։
«Մի շարք երկրներ, օրինակ, չեն ճանաչում ահաբեկչական կազմակերպություններ YPG և FETÖ (Թուրքիայում արգելված քուրդ զինյալների և քարոզիչ Ֆեթուլլահ Գյուլենի կողմնակիցների կազմակերպությունները, որոնց հետ Անկարան կապում է 2016 թվականի պետական հեղաշրջման փորձը – խմբ.), որոնց մենք ահաբեկչական ենք համարում։ Մենք ՀԱՄԱՍ-ին, որը Պաղեստինի քաղաքական համակարգի մաս է կազմում, ահաբեկչական կազմակերպություն չենք համարում։ Բայց դա չի նշանակում, որ մենք խրախուսում ենք անմեղ մարդկանց մահը, մենք դատապարտում ենք դա պաղեստինա-իսրայելական հակամարտության սրման ամենասկզբից»,- ասել է Հաքան Ֆիդանը Անկարայում դանիացի գործընկերոջ հետ ճեպազրույցում։
Հիշեցնենք, որ ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան ՀԱՄԱՍ-ը չի ճանաչում որպես ահաբեկչական կազմակերպություն:
