Բայդենը Իսրայելին ռազմական օգնություն ցուցաբերելու պատրաստակամություն կհայտնի

ԱՄՆ նախագահ Ջո Բայդենը Իսրայել կատարած այցի ընթացքում երկրի ղեկավարությանը կհավաստիացնի ռազմական օգնության կարիքները բավարարելու պատրաստակամությունը։ Այս մասին լրագրողների հետ ճեպազրույցում հայտարարել է Սպիտակ տան ազգային անվտանգության խորհրդի ռազմավարական հաղորդակցությունների համակարգող Ջոն Քիրբին, փոխանցում է ՏԱՍՍ-ը։

Նա նշել է, որ Բայդենի հետ հանդիպման ժամանակ Իսրայելի կառավարությունը նրան կտեղեկացնի հակամարտության ընթացքում ստեղծված իրավիճակի, ինչպես նաև դրա նպատակների, ծրագրերի և մտադրությունների մասին։ Քիրբին ասել է, որ Բայդենը մտադիր է իր իսրայելցի գործընկերներին ասել, որ Վաշինգտոնը չի ցանկանում, որ հակամարտությունը ընդլայնվի կամ խորանա։ ԱՄՆ-ը մտադիր է կանխել էսկալացիան տարածաշրջանում՝ անկախ նրանից՝ դա պետության կողմից է, թե ահաբեկչական խմբավորման։

Քիրբին ընդգծել է, որ Բայդենը, անկասկած, կհարցնի Իսրայելի վարչապետ Բենիամին Նեթանյահուին և նրա կաբինետի անդամներին իրենց անհրաժեշտ ռազմական օգնության մասին և կհավաստիացնի նրանց, որ Վաշինգտոնն ամեն ինչ կանի Իսրայելին աջակցելու համար։

Ավելի վաղ հաղորդվել էր, որ ԱՄՆ նախագահ Ջո Բայդենը չեղարկել է իր այցը Հորդանան։