Զախարովան՝ հայ-ադրբեջանական հարաբերությունների կարգավորման մասին
ՌԴ ԱԳՆ խոսնակ Մարիա Զախարովան հարցազրույց է տվել ադրբեջանական «Trend» լրատվական գործակալությանը, որտեղ անդրադարձել է նաև հայ-ադրբեջանական հարաբերությունների կարգավորման գործընթացին։
Զախարովան, մասնավորապես, հայտարարել է. «Հարավային Կովկասում տրանսպորտային հաղորդակցությունների ապաշրջափակումը հայ-ադրբեջանական հարաբերությունների կարգավորման առանցքային տարրն է, որը կառուցվել է 2020-2022 թվականներին՝ ամենաբարձր մակարդակով եռակողմ համաձայնագրերի շարքի հիման վրա։ Այս հարցը վստահվել է եռակողմ աշխատանքային խմբին»։
«Ընդհանուր փոխըմբռնում է ձեռք բերվել Երասխ-Ջուլֆա-Մեղրի-Հորադիզ երթուղով երկաթուղային հաղորդակցության վերականգնման և կազմակերպման կոնկրետ քայլերի իրականացման վերաբերյալ: Մեր աշխատանքում մենք ելնում ենք փոխադարձության, հարգանքի սկզբունքների պահպանման անհրաժեշտությունից ու երկու երկրների ինքնիշխանության իրավասությունից»,- հավելել է Զախարովան։
