Ուկրաինայի նախագահ Վլադիմիր Զելենսկին հաստատել է, որ Ուկրաինայի զինված ուժերն առաջին անգամ ATACMS հեռահար հրթիռներով հարվածներ է հասցրել ռուսական դիրքերին։ Այդ մասին նա հայտարարել է երեկոյան տեսաուղերձում։ Ուկրաինայի առաջնորդն ընդգծել է, որ Կիևի պայմանավորվածությունները ԱՄՆ նախագահ Ջո Բայդենի հետ «իրականացվում են շատ ճշգրիտ», հայտնում է RTVI–ը։ 

«Շնորհակալություն բոլորին, ովքեր պայքարում և աշխատում են Ուկրաինայի համար: Շնորհակալություն բոլորին, ովքեր օգնում են: Իսկ այսօր հատուկ շնորհակալություն ԱՄՆ-ին։ Նախագահ Բայդենի հետ մեր պայմանավորվածությունները կատարվում են: Դրանք շատ ճշգրիտ են իրականացվում: «ATACMS»–ներն իրենց ցույց են տվել»,- ընդգծել է Զելենսկին։ 

Ավելի վաղ՝ հոկտեմբերի 17-ի երեկոյան, The Wall Street Journal-ը, վկայակոչելով աղբյուրներ, հայտնել էր, որ Ուկրաինան առաջին անգամ կիրառել է ATACMS ռուսական զորքերի դիրքերի ուղղությամբ։ Չի նշվում, թե որ թիրախներն են խոցել հրթիռները։ Միևնույն ժամանակ, Ուկրաինայի հատուկ գործողությունների ուժերը գրել են, որ ուկրաինացի զինվորականները հարձակվել են Լուգանսկի և Բերդյանսկի օդանավակայանների վրա, ինչի հետևանքով ռուսական զորքերը «զգալի կորուստներ են կրել»։ Մասնավորապես, ոչնչացվել է տարբեր մոդիֆիկացիաների ինը ուղղաթիռ, հատուկ տեխնիկա, հակաօդային պաշտպանության կայան, զինամթերքի պահեստ, վնասվել են թռիչքուղիներ։ 

Ռուս ռազմական թղթակիցները խոստովանել են, որ Ուկրաինայի զինված ուժերը հարձակվել են Բերդյանսկի վրա՝ օգտագործելով ամերիկյան ATACMS հրթիռներ։ Ուկրաինական բանակի կողմից այդ հրթիռների կիրառման մասին Politico-ին հայտնել են նաև երկու անանուն աղբյուրներ։