ՀԱՄԱՍ–ը պատերազմ էր ուզում, նա կստանա այն. Նեթանյահու

Իսրայելի վարչապետ Բենիամին Նեթանյահուն դիմել է ժողովրդին՝ խոստանալով ՀԱՄԱՍ-ի զինյալների դեմ պատերազմը հասցնել հաղթական ավարտի։ 

Կառավարության ղեկավարի խոսքով՝ Իսրայելն այժմ պատերազմական վիճակում է իր գոյության համար։ 

«Այս պատերազմը մեզ պարտադրել են այն կենդանիները, որոնք հերոսացնում են կանանց, երեխաների ու ծերերի սպանությունները»,– ասել է Նեթանյահուն՝ ՀԱՄԱՍ–ի վայրագությունները համեմատելով «ԻՊ»–ի կատարած վայրագությունների հետ:

«Երեխաներին կապում էին և մահապատժի ենթարկում իրենց ընտանիքի մյուս անդամների հետ, երիտասարդ աղջիկներին ու տղաներին գնդակահարում էին մեջքից: Մենք միշտ գիտեինք, թե ինչ է ՀԱՄԱՍ-ը: Հիմա ամբողջ աշխարհը գիտի. ՀԱՄԱՍ-ը ԴԱԻՇ-ն է. Եվ մենք հաղթելու ենք այնպես, ինչպես լուսավոր աշխարհը հաղթեց ԴԱԻՇ-ին։ ՀԱՄԱՍ-ը պատերազմ էր ուզում, նա կստանա այն»,- ասել է Նեթանյահուն: 

Նա նշել է, որ Իսրայելի տարածքում դեռ մի շարք ահաբեկիչներ կան։ 

Ես հրահանգել եմ հարձակվել ՀԱՄԱՍ-ի վրա այնպես, ինչպես նախկինում չենք հարձակվել նրանց վրա։ Եվ դա տեղի է ունենում հենց հիմա: 

Մենք նոր ենք սկսել մեր պատերազմը ՀԱՄԱՍ-ի դեմ. Այն, ինչ հիմա տեսնում եք Գազայում, միայն սկիզբն է: Մենք հարյուրավոր ահաբեկիչների ենք սպանել և կանգ չենք առնելու: Մենք կգտնենք նրանց ցանկացած փոսում: Սա արդեն տեղի է ունենում և լինելու է: 

Նեթանյահուն հավելել է, որ ինքը ընդդիմության առաջնորդներին հրավիրել է միանալ ազգային միասնության կառավարությանը՝ առանց որևէ նախապայմանի, ճիշտ այնպես, ինչպես արեցին իսրայելցի քաղաքական գործիչները 50 տարի առաջ Յոմ Կիպուրի պատերազմի ժամանակ։