Թրամփը «ցանկություն է հայտնել, որ Նեթանյահուն հրաժարական տա»․ ԶԼՄ
ԱՄՆ նախկին նախագահ Դոնալդ Թրամփն իր կողմնակիցների հետ զրույցում ասել է՝ ցանկանում է, որ Իսրայելի վարչապետ Բենիամին Նեթանյահուն հրաժարական տա։ Այս մասին հայտնում է Rolling Stone ամսագիրը՝ վկայակոչելով աղբյուրները։
Ըստ ամսագրի՝ վերջին օրերին Թրամփը հեռախոսազրույցներ է ունեցել հանրապետականների կողմնակիցների հետ, որոնց ընթացքում նախկին նախագահը «անսովոր շատ ժամանակ է ծախսել Նեթանյահուին վիրավորելու համար»։ Թրամփը «ցանկություն է հայտնել, որ Նեթանյահուն հրաժարական տա, երբ նա ստանձնի իր պաշտոնը (ԱՄՆ նախագահի) 2025 թվականին»։ Նրա կարծիքով՝ Նեթանյահուն դա պետք է անի իր պաշտոնավարման ընթացքում Իսրայելի «աղետալի հետախուզության ձախողման» պատճառով։
Ինչպես նշում է ամսագիրը, ԱՄՆ նախկին նախագահը խոսել է նաև Պաղեստինին տրամադրվող բոլոր օգնությունները դադարեցնելու անհրաժեշտության մասին։
Հիշեցնենք՝ ավելի վաղ հայտնել էինք, որ Թրամփի խոսքով՝ «Իսրայելի վարչապետը բավականաչափ պատրաստված չէր հարձակմանը»։
