«Իսրայելի վարչապետը բավականաչափ պատրաստված չէր հարձակմանը». Թրամփ
«Իսրայելի վարչապետ Բենիամին Նեթանյահուն բավականաչափ պատրաստված չէր պաղեստինյան «Համաս» շարժման հարձակմանը»․ նման կարծիք է հայտնել ԱՄՆ նախկին նախագահ Դոնալդ Թրամփը։ «Նա էլ, Իսրայելն էլ պատրաստ չէին: Եթե Թրամփը լիներ Միացյալ Նահանգների նախագահը, նրանք ընդհանրապես ստիպված չէին լինի պատրաստվել», - ասել է Թրամփը Fox News-ին:
ԱՄՆ նախկին նախագահը քննադատել է նաև Իսրայելի հետախուզական ծառայությունների գործողությունները՝ նշելով, որ «հազարավոր մարդիկ գիտեին՝ ինչ է կատարվում», բայց, այնուամենայնիվ, չկարողացան կանխել իրավիճակի սրումը։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։
