Էրդողանի այցը Գրանադա չեղարկվել է․ նա կրկին առողջական խնդիրներ ունի

Թուրքիայի նախագահ Ռեջեփ Թայիփ Էրդողանի՝ այսօր կայանալիք իշխող «Արդարություն և զարգացում» կուսակցության նիստին մասնակցությունը և հոկտեմբերի 5-ին Իսպանիայի Գրանադա քաղաքում հանդիպումները չեղարկվել են։ Այս մասին գրում են թուրքական լրատվամիջոցները։ 

Նշվում է, որ պատճառը նրա առողջական խնդիրներն են։ Ինչպես հայտնում են, Էրդողանը երեկ երեկոյան հիվանդացել է հարբուխով և բժիշկների խորհրդով հետաձգել է Գրանադա այցը։

Հիշեցնենք՝ ավելի վաղ հայտնել ենք, որ Ադրբեջանի նախագահ Իլհամ Ալիևը հրաժարվել է անցկացնել նախօրոք պայմանավորված հանդիպումը Գրանադայում, որին պետք է մասնակցեին ՀՀ վարչապետ Նիկոլ Փաշինյանը, Եվրախորհրդի ղեկավար Շառլ Միշելը, Ֆրանսիայի նախագահ Էմանուել Մակրոնն ու Գերմանիայի կանցլեր Օլաֆ Շոլցը։ Ադրբեջանական ԶԼՄ-ները հայտնում են, որ իբրև հանդիպումից խուսափելու առիթ Ալիևը նշել է «Ֆրանսիայի ոչ կոնստրուկտիվ պահվածքը»։