ՏԵՍԱՆՅՈՒԹ. Շտապօգնության 23 մեքենա մուտք գործեց Արցախ. Հայաստան են տեղափոխվում մեր 23 հայրենակիցները
Սեպտեմբերի 24-ին Ստեփանակերտի «Հանրապետական բժշկական կենտրոնից» ՀՀ մասնագիտացված բուժհաստատություններ է տեղափոխվել վերջին ռազմական գործողությունների հետևանքով ծայրահեղ ծանր վիրավորում ստացած 23 քաղաքացի:
Վիրավորների տեղափոխումն իրականացվել է Կարմիր խաչի միջազգային կոմիտեի միջնորդությամբ՝ ՀՀ առողջապահության նախարարության կողմից հատկացված շտապօգնության մեքենաներով՝ համապատասխան բուժանձնակազմի աջակցությամբ:
Առաջիկայում ևս նախատեսվում է ծանր վիրավորում ստացած անձանց տեղափոխում ՀՀ բուժհաստատություններ:
Այս մասին է տեղեկացնում Արցախի Հանրապետության առողջապահության նախարարությունը:
Հիշեցնեմ, որ ՀՀ առողջապահության նախարարությունը հայտնում էր, որ առողջական ծանր և ծայրահեղ ծանր վիճակում գտնվող մեր 23 հայրենակիցները Ստեփանակերտի կենտրոնական հիվանդանոցից նախապատրաստվում են տեղափոխվել Հայաստանի Հանրապետություն՝ ուղեկցությամբ Կարմիր խաչի միջազգային կոմիտեի։
Ավելի վաղ հայտնել էինք՝ ԼՂ-ից Հայաստան են տեղափոխվելու ծանր և ծայրահեղ ծանր վիրավորում ստացած քաղաքացիներ:
